తీపి తినకుండా ఉండేదెలా?

నా వయసు 25. తీపి పదార్థాలు చూస్తే తినకుండా ఉండలేను. అర్ధరాత్రి ఆకలేసినా ఏదో ఒక స్వీటు తినాల్సిందే. ఈ అలవాటు అనారోగ్యాలకు దారితీస్తుందని తెలిసినా నియంత్రించుకోలేకపోతున్నా. ఈ అలవాటు మానేదెలా?

రజిత, హైదరాబాద్‌

ఆహారానికి ఆకలిని సంతృప్తిపరిచే గుణం ఉంటుంది. దీన్ని ఆస్వాదిస్తూ, ఒత్తిడినీ తగ్గించుకుంటున్నామనే భావనా కలుగుతుంది. అందుకే, ఆకలితో సంబంధం లేకుండా నచ్చింది తిని సంతోషపడిపోతుంటారు చాలామంది. ఇక, మీ విషయానికి వస్తే మీరు తీపి పదార్థాలను తినకుండా ఉండలేకపోవడాన్ని సమస్య అనే కంటే, ఓ అలవాటుగా చెప్పొచ్చు. కొంతమంది చికెన్‌ని ఇష్టపడితే, మరికొందరు ఐస్‌క్రీమ్‌లు, ఇంకొందరు చాక్లెట్లూ... వంటివి అతిగా తింటూ ఉంటారు. రుచి, సువాసన, టెక్స్చర్స్, టెంపరేచర్, క్రంచీ...లను సెన్సోరియల్‌ ఆట్రిబ్యూట్స్‌ అంటాం. వీటిని జ్ఞానేంద్రియాలు గ్రహించడం వల్ల తినాలనే కోరిక కలుగుతుంది. అలా మీరు స్వీట్లు తినడాన్ని నియంత్రించుకోలేకపోతున్నారు. ఈ అలవాటు దీర్ఘకాలంలో టీ, కాఫీ, మద్యపానంలాంటి వ్యసనంగానూ మారే అవకాశమూ ఉంది. ఇక, జీవనశైలి యాంత్రికంగా మారడంతో అందరిలోనూ ఒత్తిడి సహజమైపోయింది. దీని ఉపశమనానికి సంగీతం వినడమో, ఆరుబయట నడకకు వెళ్లడమో ఒకప్పుడు చేసేవారు. ఇప్పుడా పరిస్థితులూ లేవు. దీంతో మనసు మళ్లించుకోవడానికి నోట్లో ఒక టాఫీ వేసుకోవడమో, స్వీటో, ఐస్‌క్రీమో ఆరగించేస్తున్నారు. అందుకే, దానివల్ల ఎదురయ్యే  అనారోగ్య ముప్పుని గ్రహించి ఇంటికి స్వీట్లు తెచ్చిపెట్టుకోవడం ఆపేయండి. ఒకవేళ ఉన్నా.. ఎదురుగా కనిపించకుండా చూసుకోండి. తీపి రుచి చూడటమే ముఖ్యం అనుకుంటే స్వీటుని చిన్న ముక్కలా చేసి తిన్నా చాలు. అలానే అధిక కెలొరీలు ఉన్న పదార్థాలకు ప్రత్యామ్నాయాలను వెతుక్కోండి. ఉదాహరణకు మోతీచూర్‌ లడ్డూ, గులాబ్‌జామ్‌ లాంటి ఎక్కువ పాకం ఉన్నవి కాకుండా రసమలై, బొరుగుల ఉండ, రాజ్‌గిరా చిక్కీ వంటివి తీసుకోండి. రాగి, నువ్వుల లడ్డూలు, తక్కువ తీపితో చేసే ప్లెయిన్‌ కస్టర్డ్, జెల్లీలాంటివీ సిద్ధం చేసుకుని ఉంచుకోవచ్చు. పండ్లముక్కలు కోసి ఉంచుకుంటే...తినాలనిపించినప్పుడు మీ తీపి ఆలోచనల్ని పక్కనపెడతాయి. తక్కువ మొత్తంలో డ్రైఫ్రూట్స్‌ని కూడా తీసుకోవచ్చు. ఈ అలవాట్లతో మీరు ఎక్కువగా స్వీట్లు తినడం తగ్గించుకోవచ్చు. ప్రయత్నించి చూడండి.