Ivvjaġġar matul il-pandemija tal-coronavirus

B’reazzjoni għall-pandemija tal-COVID-19, u r-restrizzjonijiet sussegwenti fuq l-ivvjaġġar stabbiliti mill-Istati Membri biex jipproteġu s-saħħa pubblika, l-UE introduċiet miżuri biex tiffaċilita l-ivvjaġġar sikur filwaqt li tillimita l-propagazzjoni tal-virus u tipproteġi s-saħħa u l-benesseri tal-Ewropej kollha:

Matul il-pandemija tal-COVID-19, l-Istati Membri tal-UE ħadu diversi miżuri biex jirrestrinġu l-ivvjaġġar sabiex jillimitaw it-tixrid tal-coronavirus. Biex tiżgura koordinazzjoni u komunikazzjoni ċara fl-UE kollha, il-Kummissjoni ħadmet fuq it-trawwim tal-kooperazzjoni u l-iskambju ta’ informazzjoni dwar tali restrizzjonijiet.

Fit-13 ta’ Ottubru 2020, abbażi ta’ proposta tal-Kummissjoni, il-Kunsill adotta Rakkomandazzjoni dwar approċċ ikkoordinat għar-restrizzjoni tal-moviment liberu b’reazzjoni għall-pandemija tal-COVID-19. Ir-Rakkomandazzjoni kellha l-għan li tevita l-frammentazzjoni u t-tfixkil, u li żżid it-trasparenza u l-prevedibbiltà għaċ-ċittadini u n-negozji. B’mod aktar speċifiku, hi stabbiliet approċċ komuni dwar il-punti ewlenin li ġejjin:

• L-applikazzjoni ta’ kriterji u limiti komuni meta jiġi deċiż jekk għandhomx jiġu introdotti restrizzjonijiet fuq l-ivvjaġġar

• Immappjar taż-żoni ta’ riskju tat-trażmissjoni tal-COVID-19 abbażi ta’ kundizzjonijiet komuni u kodiċi tal-kuluri maqbul, ippubblikat miċ-Ċentru Ewropew għall-Prevenzjoni u l-Kontroll tal-Mard

• Qafas komuni għal miżuri applikati għal vjaġġaturi minn żoni ta’ riskju għoli

• Koordinazzjoni fost l-Istati Membri u informazzjoni ċara u f’waqtha lill-pubbliku dwar kwalunkwe restrizzjoni

Ir-Rakkomandazzjoni tal-Kunsill ġiet aġġornata diversi drabi b’rispons għall-iżviluppi tal-pandemija. Dan kien jinkludi l-istabbiliment ta’ perjodi ta’ validità standard għat-testijiet tal-infezzjoni tal-COVID-19.

Għodda importanti oħra biex jiġi ffaċilitat l-ivvjaġġar sikur fl-UE, kien ir-Regolament dwar iċ-Ċertifikat COVID Diġitali tal-UE, li daħal fis-seħħ fl-1 ta’ Lulju 2021. Iċ-ċertifikat serva bħala prova li persuna tlaqqmet kontra l-COVID-19, kienet reċentement irċeviet riżultat negattiv tat-test jew irkuprat mill-COVID-19. Meta jivvjaġġa, kull detentur taċ-Ċertifikat ikollu l-istess drittijiet bħaċ-ċittadini tal-Istat Membru miżjur li jkunu tlaqqmu, ġew ittestjati jew irkupraw mill-COVID-19. Bħala tali, ir-regolament kellu l-għan li jiffaċilita t-tneħħija gradwali tar-restrizzjonijiet fuq l-ivvjaġġar stabbiliti mill-Istati Membri.

Użat mill-biċċa l-kbira tal-Istati Membri mit-tnedija tiegħu fl-2021 sa nofs l-2022, iċ-Ċertifikat COVID Diġitali tal-UE kien suċċess kbir fl-isforzi tal-Ewropa biex tindirizza u ttaffi l-impatt tal-pandemija tal-COVID-19 fuq is-soċjetajiet u l-ekonomiji. B’aktar minn 2.3 biljun ċertifikat maħruġa, kien kruċjali li jiġu appoġġjati l-moviment liberu u l-industrija tat-turiżmu tal-Ewropa li ntlaqtet ħażin ħafna. Hekk kif is-sitwazzjoni epidemjoloġika tjiebet, ir-rekwiżiti biex jinżammu Ċertifikati COVID Diġitali tal-UE għall-ivvjaġġar intra-UE naqsu. Fid-29 ta’ Ġunju 2022, biex jiġi żgurat l-ivvjaġġar kontinwu fil-każ ta’ deterjorament sinifikanti tas-sitwazzjoni epidemjoloġika, ir-Regolament dwar iċ-Ċertifikat COVID Diġitali tal-UE ġie estiż sat-30 ta’ Ġunju 2023. Sa Awwissu 2022, l-Istati Membri kollha kienu neħħew ir-restrizzjonijiet kollha tal-ivvjaġġar intra-UE.

Fil-5 ta’ Mejju 2023, l-Organizzazzjoni Dinjija tas-Saħħa ddikjarat it-tmiem tal-pandemija tal-COVID-19 bħala emerġenza tas-saħħa pubblika ta’ tħassib internazzjonali. B’riflessjoni ta’ din is-sitwazzjoni, il-Kummissjoni ma pproponietx estensjoni ulterjuri tar-Regolament dwar iċ-Ċertifikat COVID Diġitali tal-UE lil hinn mit-30 ta’ Ġunju 2023. Mill-1 ta’ Lulju 2023, ir-regolament u r-rakkomandazzjoni tal-Kunsill li takkumpanjah m’għadhomx fis-seħħ.

L-impatt pożittiv tas-sistema taċ-Ċertifikat COVID Diġitali tal-UE estenda lil hinn mill-UE, peress li saret standard globali bbażat b’mod sod fuq il-valuri tal-UE ta’ ftuħ, sigurtà u protezzjoni tad-data. B’mod ġenerali, 78 pajjiż f’ħames kontinenti bbenefikaw mis-sistema. Dan is-suċċess ikkontribwixxa għat-tkomplija tal-ivvjaġġar internazzjonali f’kondizzjonijiet sikuri u għall-irkupru globali. L-organizzazzjoni Dinjija tas-Saħħa ddeċidiet li tadotta s-sistema tal-UE taċ-ċertifikazzjoni diġitali tal-COVID-19 biex tistabbilixxi sistema globali li se tgħin biex tipproteġi liċ-ċittadini madwar id-dinja minn theddid kontinwu u futur għas-saħħa, inklużi pandemiji.

Għal aktar informazzjoni dwar l-użu futur possibbli tat-teknoloġija sottostanti, ara ċ-Ċertifikat COVID Diġitali tal-UE.

Kmieni matul il-pandemija, fis-16 ta’ Marzu 2020, il-Kummissjoni adottat Komunikazzjoni li tirrakkomanda restrizzjoni temporanja fuq l-ivvjaġġar mhux essenzjali minn pajjiżi terzi lejn l-UE. Fis-17 ta’ Marzu 2020, l-Istati Membri qablu li jimplimentaw ir-restrizzjoni temporanja, bl-erba’ Stati Assoċjati ma’ Schengen jimplimentawha wkoll.

Fit-30 ta’ Ġunju 2020, wara proposta mill-Kummissjoni fl-11 ta’ Ġunju, il-Kunsill adotta rakkomandazzjoni dwar it-tneħħija gradwali tar-restrizzjonijiet temporanji fuq l-ivvjaġġar mhux essenzjali lejn l-UE. Ir-Rakkomandazzjoni tal-Kunsill ġiet aġġornata diversi drabi b’rispons għall-iżviluppi tal-pandemija.

Matul il-perjodu fejn kienu fis-seħħ restrizzjonijiet għall-ivvjaġġar lejn l-UE, ġew stabbiliti xi eżenzjonijiet biex jiġi żgurat il-moviment liberu taċ-ċittadini, tal-merkanzija u tas-servizzi – b’rispett sħiħ tal-miżuri tas-saħħa u s-sikurezza. Dawn jistgħu jiġu kkonsultati hawnhekk:

Eżenzjonijiet għar-restrizzjonijiet fuq l-ivvjaġġar tal-coronavirus

Wara l-adozzjoni tar-Rakkomandazzjoni tal-Kunsill (UE) 2022/2548 tat-13 ta’ Diċembru 2022, jenħtieġ li l-Istati Membri ma jimponu ebda restrizzjoni fuq l-ivvjaġġar għal raġunijiet ta’ saħħa pubblika minħabba l-pandemija tal-COVID-19. Madankollu, il-pajjiżi tal-UE daħħlu fis-seħħ xi salvagwardji f’każ ta’ sitwazzjoni epidemjoloġika li qed tiddeterjora jew li jitfaċċaw varjant ġdid ta’ tħassib.

Wara t-tifqigħa tal-pandemija tal-COVID-19, il-Kummissjoni Ewropea u s-Servizz Ewropew għall-Azzjoni Esterna għenu biex jinġiebu lura f’pajjiżhom ċittadini tal-UE li nqabdu f’pajjiżi oħra minn madwar id-dinja kollha.

Informazzjoni dwar id-drittijiet taċ-ċittadini tal-UE għall-protezzjoni diplomatika jew konsulari barra l-UE

^{Ċaħda ta’ responsabilità. Il-paġna ġiet aġġornata l-aħħar f’Settembru 2023}