L-Ukrajna tiċċelebra Jum l-Indipendenza: l-UE tafferma mill-ġdid l-appoġġ tagħha

Hekk kif l-Ukrajna llum tiċċelebra Jum l-Indipendenza tagħha, l-UE qed tikkonferma mill-ġdid l-appoġġ sod tagħha lill-pajjiż hekk kif jiddefendi ruħu kontra r-Russja, sakemm ikun hemm bżonn. “L-Ewropa dejjem se tkun fuq in-naħa tal-Ukrajna, għax l-Ukrajna hija l-Ewropa,” qalet il-President tal-Kummissjoni Ewropea Ursula von der Leyen fil-messaġġ bil-video tagħha. L-Ukrajna issa daħlet fit-tielet sena ta’ kunflitt tagħha mar-Russja, li invadiet illegalment lill-Ukrajna fi Frar 2022.  

L-Ewropa ilha mal-Ukrajna sa mill-ewwel jum tal-invażjoni. L-UE pprovdiet, u se tkompli tipprovdi, lill-Ukrajna b’appoġġ finanzjarju, umanitarju, militari, diplomatiku u morali. S’issa, l-UE u l-Istati Membri tagħha għamlu disponibbli kważi €114-il biljun għall-Ukrajna u għall-Ukreni; offriet protezzjoni temporanja lil aktar minn erba’ miljun persuna li qed jaħarbu mill-invażjoni u ġabret setgħa finanzjarja biex tgħin lill-Ukrajna tirreżisti u tirkupra permezz tar-rikavat tal-assi Russi ffriżati u l-Faċilità tagħha għall-Ukrajna ta’ €50 biljun, fost miżuri oħra.  

L-UE u l-Istati Membri tagħha se jkomplu jindirizzaw il-ħtiġijiet militari u ta’ difiża urġenti tal-Ukrajna, permezz tal-Faċilità Ewropea għall-Paċi u l-Missjoni ta’ Assistenza Militari tal-UE, kif ukoll permezz ta’ assistenza bilaterali diretta mill-Istati Membri. Sadanittant, l-Ukrajna qed tieħu passi rapidi biex tissieħeb fl-UE f’konformità mat-twemmin sod tal-UE li l-Ukrajna hija l-Ewropa. 

L-appoġġ tal-UE lill-Ukrajna huwa dirett lejn l-iżgurar ta’ paċi komprensiva, ġusta u sostenibbli għall-Ukrajna. Waħda li terġa’ tagħti s-sovranità u l-integrità territorjali lura lill-Ukrajna. L-appoġġ tal-UE sakemm tinkiseb il-paċi jirrifletti l-fehmiet tal-maġġoranza l-kbira tal-Ewropej. Stħarriġ tal-Ewrobarometru riċenti juri li kważi disgħa minn kull għaxar (87%) Ewropej jaqblu li jingħata appoġġ umanitarju lill-persuni affettwati mill-gwerra, u aktar minn tmienja minn kull għaxra (83%) jaqblu li n-nies li qed jaħarbu mill-gwerra għandhom jintlaqgħu fl-UE. 

Bħala sinjal tas-solidarjetà tal-UE mal-Ukrajna f’Jum l-Indipendenza tagħha, l-UE tajret il-bandiera tal-Ukrajna quddiem il-Parlament Ewropew u dawlet diversi binjiet ewlenin tagħha fi Brussell bil-kuluri Ukreni. 

Għal aktar informazzjoni 

Solidarjetà tal-UE mal-Ukrajna 

Solidarjetà mal-Ukrajna 

Messaġġ bil-video tal-President von der Leyen

Stħarriġ tal-Ewrobarometru