Lá na Saoirse á cheiliúradh ag an Úcráin: A thacaíocht athdhearbhaithe ag an Aontas

Agus Lá na Saoirse á cheiliúradh ag an Úcráin inniu, tá an tAontas ag athdhearbhú a thacaíocht bhuanseasmhach don tír, chomh fada agus is gá, agus í á cosaint féin i gcoinne na Rúise. “Beidh an Eoraip ar thaobh na hÚcráine i gcónaí, toisc gurb ionann iad an Úcráin agus an Eoraip,” a dúirt Uachtarán an Choimisiúin Eorpaigh, Ursula von der Leyen, ina teachtaireacht físeáin. Tá tús anois leis an tríú bliain den choinbhleacht idir an Úcráin agus an Rúis, a rinne ionradh neamhdhleathach ar an Úcráin i mí Feabhra 2022.  

Tá an Eoraip ag seasamh leis an Úcráin ón gcéad lá den ionradh. Tá tacaíocht airgeadais, dhaonnúil, mhíleata, taidhleoireachta agus mhorálta curtha ar fáil ag an Aontas don Úcráin agus leanfaidh sé de bheith á cur ar fáil aici. Go dtí seo, tá beagnach €114 bhilliún curtha ar fáil ag an Aontas agus a Bhallstáit don Úcráin agus do mhuintir na hÚcráine; chuir sé cosaint shealadach ar fáil do bhreis agus ceithre mhilliún duine atá ag teitheadh ón ionradh agus tá cumhacht airgeadais slógtha aige chun cabhrú leis an Úcráin seasamh in aghaidh na bhfáltas ó shócmhainní reoite na Rúise agus téarnamh a dhéanamh trí na fáltais sin agus trí Shaoráid na hÚcráine dar luach €50 billiún, i measc bearta eile.  

Leanfaidh an tAontas agus a Bhallstáit de bheith ag tabhairt aghaidh ar riachtanais phráinneacha mhíleata agus chosanta na hÚcráine, go háirithe tríd an tSaoráid Eorpach Síochána agus trí Mhisean Cúnaimh Mhíleata an Aontais, agus trí chúnamh déthaobhach díreach ó na Ballstáit. Idir an dá linn, tá céimeanna gasta á nglacadh ag an Úcráin chun dul isteach san Aontas i gcomhréir le creideamh daingean an Aontais gurb ionann iad an Úcráin agus an Eoraip. 

Tá tacaíocht an Aontais don Úcráin dírithe ar shíocháin chuimsitheach chóir inbhuanaithe a chinntiú don Úcráin. Síocháin lena n-athbhunófar ceannasacht agus iomláine chríochach na hÚcráine. An tacaíocht a chuirfidh an tAontas ar fáil go dtí go mbainfear an tsíocháin amach, léiríonn sí tuairimí thromlach mór mhuintir na hEorpa. De réir shuirbhé Eorabharaiméadair a rinneadh le déanaí, aontaíonn beagnach naonúr as gach deichniúr (87%) de mhuintir na hEorpa gur cheart tacaíocht dhaonnúil a chur ar fáil do na daoine atá thíos leis an gcogadh, agus aontaíonn níos mó ná ochtar as gach deichniúr (83%) gur chóir fáilte isteach san Aontas a chur roimh dhaoine atá ar a dteitheadh ón gcogadh. 

Mar chomhartha de dhlúthpháirtíocht an Aontais leis an Úcráin Lá na Saoirse, chuir an tAontas bratach na hÚcráine ar foluain os comhair Pharlaimint na hEorpa agus shoilsigh sé roinnt dá phríomhfhoirgnimh sa Bhruiséil i ndathanna na hÚcráine. 

Tuilleadh eolais 

Dlúthpháirtíocht an Aontais Eorpaigh leis an Úcráin 

An dlúthpháirtíocht leis an Úcráin 

Teachtaireacht físeáin ón Uachtarán von der Leyen

Suirbhé Eorabharaiméadair