'Gobeithio am Eisteddfod gystal â Phontypridd yn Wrecsam'

Mae cadeirydd pwyllgor gwaith Eisteddfod Genedlaethol 2025 wedi dweud bod "y bwrlwm wedi dechrau'n barod" yn Wrecsam.

"Mae hon wedi bod mor llwyddiannus, mae rhywun bron yn gobeithio gallwn ni barhau hefo'r llwyddiant yna a dod â 'Steddfod gystal â hon," meddai Llinos Roberts.

Ychwanegodd fod ganddi "dîm da" o bobl yn paratoi ar gyfer y flwyddyn nesaf yn y gogledd-ddwyrain.

Wrth longyfarch criw Pontypridd am "wythnos wych," ychwanegodd bod gwersi i'w dysgu wrth feddwl am yr ŵyl nesaf.

"Mae 'di bod yn arbrawf gwneud Eisteddfod yn y parc ac yn ymyl y dre'," meddai Ms Roberts.

"Dwi'n meddwl bod hi 'di bod yn arbrawf sy'n gweithio'n arbennig o dda."

Mae Ms Roberts yn dweud ei bod hi'n "teimlo'n bositif" wrth gymryd yr awenau gan Eisteddfod Rhondda Cynon Taf.

Ychwanegodd fod cyfarfodydd yn digwydd er mwyn trafod syniadau o'r hyn fydd ar gael y flwyddyn nesaf.

Y gobaith, meddai, ydy cynnig Eisteddfod "gynhwysfawr" yn y gogledd, gan "efelychu" polisi Pontypridd o geisio denu siaradwyr newydd.

"Mae natur ieithyddol Wrecsam yn debyg iawn, iawn i'r ardal yma," meddai.

Ar y Maes ym Mhontypridd, mae meddyliau eisteddfodwyr hefyd nawr yn troi at Wrecsam.

"Mae hwn yn anodd i guro," meddai Nia a'i merch, Ffion, wrth fwynhau'r heulwen.

Mae'r ddwy yn bwriadu teithio i Wrecsam y flwyddyn nesaf, gyda Ffion yn ystyried mynd i Maes B gyda'i ffrindiau hefyd.

Dywedodd Roy o Abertawe bod Parc Ynysangharad wedi bod "yn wych" o ran ei hygyrchedd, gan gynnig gwersi i Eisteddfodau'r dyfodol.

"Mae'r parc yn ddelfrydol," meddai.

“Fi’n credu bod hi’n wers i bob eisteddfod sydd i ddod."

Mae Roy a'i wraig Heather yn edrych ymlaen at deithio i Wrecsam y flwyddyn nesaf, gan obeithio y bydd pethau yr un mor hawdd yno hefyd.

“Mae wedi bod yn grêt," meddai Ioan o Landysul.

"Ma' digon o le 'ma, mae’r sioeau sydd wedi bod ar y llwyfannau yn grêt, mae’r bwyd yn ffein."

Mae llwyddiant eleni, meddai, wedi ei gyffroi ac mae'n edrych ymlaen at y flwyddyn nesaf.

I Cai a'i deulu o Bontypridd, mae'r Eisteddfod eleni wedi bod yn destun balchder, yn enwedig oherwydd bod ei dad yn rhan o'r Orsedd.

"Mae’n ffantastig fod e’n lleol," meddai.

Dywedodd ei fod yn gobeithio y bydd Ryan Reynolds yn dod i’r Eisteddfod y flwyddyn nesaf

“Mae o bach yn bell i fi fynd â’r plant, ond os fydda i’n gallu ffeindio fy ffordd yna fydda i’n mynd."

Gyda blwyddyn gyfan i baratoi, mae'r sylw nawr yn troi at y criw sy'n trefnu'r digwyddiad yn Wrecsam.

"S'gynnon ni'm lleoliad i'n heisteddfod ni eto," meddai Llinos Roberts.

"Mi fyddan ni'n cyhoeddi lleoliad yr Eisteddfod ddechrau Hydref."

Er i'r Eisteddfod ymweld â Wrecsam yn 2011, mae Llinos o'r farn bod y ddinas "wedi gweddnewid" ac mi fydd rhaid adlewyrchu hynny.

"Mae 'na lawer o fwrlwm yn Wrecsam. Mae 'na lawer o ddiddordeb yn Wrecsam. Mae pawb yn gwybod lle mae Wrecsam ar hyd y byd i gyd erbyn hyn."

Er i Llinos gadarnhau bod yr Eisteddfod yn cydweithio gyda'r clwb pêl-droed yn y ddinas, doedd hi methu cadarnhau presenoldeb Ryan Reynolds a Rob McElhenney flwyddyn nesaf.

"Mae'n dibynnu os ydy Deadpool yn ffilmio ai peidio, yn dydy!?"